Faci a is apretus de custas diis, polèmicas apitzus de sa Protetzioni civili.

In su mentris chi nc’est ancora un’apretu mannu po su terremotu e su tempus malu, nci funt polèmicas mannas apitzus de s’eficièntzia de su sistema de Protetzioni civili de immoi.

Polèmicas apitzus de sa Protetzioni civili

Tenit arrexoni Guido Bertolaso candu narat chi s’organizatzioni de sa Protetzioni civili no funtzionat poita ca “no si bolit acetai, in su Stadu nostru, chi nci siat una persona sceti chi decidat, dòngiat ordinis, si pighit responsabilidadis, nci pòngiat sa faci sua”?

O tenit arrexoni Raffaele Cantone candu preguntat “si apalas de calincuna afirmatzioni craramenti strumentali no nc’est sa gana de torrai a sa polìtica de is manus lìberas”?

In su mentris chi suant is polèmicas apitzus de is retardus e de is fartas in sa gestioni de s’apretu po su terremotu e su tempus malu de parti de sa Protetzioni civili e de is àterus entis competentis in medas narant sa matessi cosa. Sa Proteztioni civili no tenit prus is ainas de una borta, de is tempus de Bertolaso, candu nci fiat cussa chi issu narat “una cadena eficienti de cumandu”.

Est beru, sa Protetzioni civili de insaras teniat poderis ispantosus, poita ca Bertolaso fiat in su matessi tempus sutasegretàriu in Palazzo Chigi, cumissàriu e cabu de sa Protetzioni civili.

Fraigada de Giuseppe Zamberletti po fai fronti a su terremotu de su Frìuli in su 1976, sa Proteztioni civili at tentu finalmenti una lei sua de organizatzioni in su 1992. Ma est degollada sceti cun su guvernu Berlusconi in su 2001 cun poderis ispantosus diaderus. Custus poderis perou no ddus ant impreaus po gestiri is apretus sceti, ma funt serbius puru po gestiri in manera prus lestra, cun is “manis lìberas” iat a nai Cantone, is acontèssius mannus. Lassendi-sì apalas sa trasparèntzia, e ponendi-sì a gestiri, cun custus poderis, cosas chi iant ai depi essi gestidas in manera crara e no ispantosa, comenti su G8 de Sa Madalena e is Giogus de su Mediterràneu.

Po custas arrexonis a Bertolaso nci dd’ant bogau in su 2010 e ant decìdiu de sacrificai unu pagu de eficèntzia po tenni sa trasparèntzia prus manna e in su 2013 su Guvernu Monti at mudau sa lei apitzus de sa Protetzioni civili.

Chi oi sa cadena de su cumandu est segada, nc’est perou una trasparèntzia prus manna, mancai custu bollat nai chi tocat a sighiri is tempus de sa burocratzia. Po donai respostas luegu perou tocat a pigai decisionis cun lestresa.

In custas diis ant chistionau meda de is turbinas, e ant nau chi mancai me in is logus terremotaus no nci ndi funt medas, nci ndi funt in cantidadi manna in àterus logus in Itàlia. Serbiat a ddas transiri de unu logu a s’àteru, finas a ddas pigai in afitu de chini ddas tenit. Ma po fai de aici cun lestresa, no fait a sighiri sa trasparèntzia e sa “burocratzia”. Serbit un afidamentu deretu, mancai no siat trasparenti ca cun is afidamentus deretus est prus fàcili a furai. No si podit tenni totu. Forsis si boleus s’eficèntzia prus manna depeus fai de mancu de unu pagu de trasparèntzia.

de Massimiliano Meloni