Cena de annu nou. Is famìlias italianas ant a spendi 3 milliardus de èuros

Una chirca de Confersercenti stimat chi is famìlias italianas ant a spendi 3 milliardus de èuros, 116 èuros in mèdia cada una, po sa cena de annu nou

3 milliardus po sa cena de annu nou

Is famìlias italianas ant a spendi po sa cena de sa festa de annu nou 3 milliardus de èuros: ddu narat una chirca de SWG bòfia de Confesercenti. Sa spesa mèdia po famìlia at a essi de 116 èuros cada una, su 13% in prus cunfrontu a s’annu passau.

Su 69% de is italianus at a passai sa noti de annu nou in domu- s’annu passau fiat su 71%, cincu annus fait indiritura s’80% – . S’11% at a festai me is restorantis. A dolu mannu su 2% de is italianus no at a festai poita ca no si ddu podit permiti.

S’ammànniat puru sa spesa po is vacantzas, ca is italianus chi ant a passai sa festa de annu nou in vancantza ant a spendi su 3% in prus de s’annu passau po unu totali de 4,4 milliardus de èuros.

Is nùmerus chi pertocant is vacantzas funt de record. Difatis po un’àtera chirca de Confesercenti s’87% de is aposentus ofertus po mori de Internet funt prenotadas. Sa Sardìnnia est in lìnea perfeta cun sa mèdia natzionali, chi andat de su 70% de sa Sitzìlia a su 97% de su Trentino Alto Adige. Su datu cunfirmat cussu de totu su tretu de is festas de acabbu 2017, chi ant registrau 16,8 millionis de presèntzias, 380 milla in prus de s’annu passau.

de Boxis