Machineddas, is italianus spendint prus de 49 milliardus po giogai

Sa circa de sa truma editoriali GEDI est ispantosa. In su 2016 is italianus ant spèndiu prus de 95 milliardus po giogai, 49 milliardus abruxaus in machineddas.

49 milliardus in machineddas

Is italianus in su 2016 ant spèndiu 95 milliardus de èuros po giogai a gratta e vinci, loterias, scummissas sportivas, lotu, superenalotu, machineddas e unu scantu de àterus giogus chi promitint de fai binci dinai. Prus de 49 milliardus de èuros ddus ant giogaus me is machineddas -slot machine e video lottery -, chi in totu su territòriu funt prus de 400 milla.

Custus datus ispantosus funt bessius a pillu de una circa fata de sa truma editoriali GEDI (cussa de Repubblica e de L’Espresso) in collaboratzioni cun Dataninja. Sigumenti 95 milliardus funt una cifra prus manna de duas manovras finantziàrias sa cosa apensamentat meda.

Po su chi pertocat is machineddas, is circadoris ant postu in relatzioni is datus Istat apitzus de sa popolatzioni, cussus de su Ministèru de s’Economia apitzus de su rèdditu e cussus de s’Agentzia de is Doganas apitzus de su dinai arregoltu de is giogus. Su resultau est unu data base de interrogai on line scriendi su nòmini de unu cumunu po sciri cantu ant giogau in cussu cumunu a is machineddas in su 2016.

Sa Regioni chi spendit de prus in assolutu me is machineddas est sa Lombardia – 10 milliardus de èuros – sighida de su Làzio -5 milliardus e 125 millionis de èuros – e de su Vèneto – 4 milliardus e 662 millionis de èuros-.

Po su chi pertocat s’ispesa pro capite me is machineddas, sa classìfica est ghiada sèmpiri de sa Lombardia – 1.063,3 èuros – sighida custa borta de s’Emìlia Romagna – 1.014,1 èuros – e de s’Abruzzo – 954,5 èuros -. Sa Sardìnnia est me is urtìmas positzionis cun 662,1 èuros pro capite. A pustis de sa Sardìnnia nci funt sceti àteras cuàturu regionis.

Sa classìfica de is regionis cun prus machineddas dònnia milla abitantis est su Molise -8.830 -. Innoi sa Sardìnnia est sa de cuàturu in classìfica cun 8520 machineddas.

A chini andat su dinai bintu? Su 71,6% andat me is busciacas de is giogadoris chi perou ddu torrant a giogai luegu. Su 28,3 % andat a su Stadu, su 6% a is negotziantis, su 4,3% a is gestoris, su 0,5% a is cuncessionàrius.

de Massimiliano Meloni