Bulletas: s’annu chi benit 952 èuros in prus a famìllia

Po una chirca de s’Abusdef s’annu chi benit is famìllias ant a pagai in mèdia 952 èuros po is bulletas.

Aumentu de is bulletas

S’annu chi benit ant a essi 952 is èuros chi is famìllias ant a depi pagai in prus po is bulletas. Ddu narat una chirca de s’assòtziu de is consumadoris Abusdef.

Is gastus chi ant a ammanniai pertocant s’àcua, su gas e s’energia elètrica ma puru is trasportus e is serbìtzius de is bancas e de is asseguratzionis, comenti puru is prodùsius alimentaris, is gastus po sa scola e is tarifas professionalis.

S’aumentu de is gastus po s’energia elètrica at a essi nexi de s’arreforma de su mercau de s’energia ca prebidit s’abbandonu de su mercau amparau in favori de su mercau lìberu. S’arreforma at a pertocai 22 millionis de famìllias chi tenint consumus bàscius.

Po s’Adusbef s’energia elètrica e su metano a sa fini ant a costai in mèdia 68 èuros in prus, s’àcua 45 èuros. Sa RC auto at a costai in mèdia 25 èuros in prus, is trasportus 97 èuros, 49 èuros sa Tari, 156 èuros is tarifas professionalis e artisanalis, 55 èuros is ticket sanitàrius, 18 èuros is tarifas postalis, 38 èuros is servìtzius bancàrius.

Una nova bona arribat asumancu de s’ùrtima lei finantziària. In martzu de s’annu chi benit at a intrai in vigori sa lei chi proibidit is agualaduras mannas, eus a nai is bulletas grais chi pertocant is consumus de is annus passaus. Is aziendas no ant a podi preguntai agualaduras po tretus prus mannus de duus annus, ca ant a tenni 24 mesis e no prus cincu annus po preguntai su pagamentu de is consumus passaus chi no ant postu in contu.

de Boxis