Facebook e is arrastus digitalis. Candu s’identidadi digitali dda sceberant is àterus

Pubricai in Facebook bolit nai lassai arrastus digitalis. Medas pipus a mannus s’ant a agatai de aici cun un’identidadi digitali gia formada

Facebook e is arrastus digitalis

Una picioca austrìaca de18 annus at denuntziau su babbu e sa mamma po is fotografias suas chi issus ant pubricau in Facebook de candu fiat pipia a oi. Sa picioca bolit chi issus nci boghint de su social network totus is fotografias ma bolit unu remborsu puru po su dannu chi issa narat de ai tentu de custa cosa.

Is fotografias ddas ant pubricadas sena de s’autorizatzioni sua, ca issa fiat pitichedda e su babbu e sa mamma detzidiant po issa. Oi perou cussas fotografias dda faint chesciai, poita ca dd’amostant in situatzionis chi ddi faint tenni bregùngia. Immoi bolit detzidi issa ita pubricai in Facebook, ma at scobertu chi tenit giai un’identidadi digitali, detzìdia de àterus e no de issa. Parit cosa de arriri ma est una cosa sèria.

Sa pràtica de ponni in Facebook o in is àterus social network is fotografias de is pipius est una cosa chi faint in medas babbus e mammas. Chi perou no cunsìderant is diritus de is personas pubricadas, chi a mannas iant a depi podi tenni sa possibilidadi de detzidi ita fai de sa privacy online insoru.

Candu custus pipius ant a essi mannus, ant a agatai on line un’identidadi insoru chi ddus precedit e una stòria chi no ant sceberau. Custa cosa podit essi unu problema mannu po is giovuneddus, chi bivint un’edadi innui su problema de s’identidadi personali est de importu mannu. Difatis issus detzidint pròpriu in cust’edadi chini bolint essi.

Tocat a nai puru chi est diventendi sèmpiri prus difìtzili a nci bogai de internet is informatzionis chi pertocant nosu etotu, cussas chi ddis narant arrastus digitalis e chi andant a formai s’identidadi digitali.

Totus is informatzionis, is arrastus, giai oi ddas bendint a is aziendas chi ddas circant po fai indàginis de mercau e po scoberri ita praxit a is consumadoris. In is Stadus Unius is Universidadis prus famadas spricullitant is identidadis digitalis prima de amiti is studentis, po sciri chi funt e chi ddis minescit de ddus amiti. Giai totus is aziendas faint sa pròpria cosa prima de pigai unu a traballai

Is arrastus digitalis tenint un’importu mannu e sa genti ddus lassat in internet comenti chi nudda. Su benidori at a podi fai prus spantu e at a podi ponni prus dudas puru. Duncas iat a essi mellus chi donniunu podessit scriri sa stòria digitali sua.

de Massimiliano Meloni