Brexit e Fake news. Facebook e Twitter arriscant de èssere santzionados

Is duas retzes sotziales a suta de inchiesta po su chi pertocat is fake news.

Facebook e Twitter a suta de inchiesta

Facebook e Twitter arriscant de èssere santzionados in s’inchiesta britànnica a pitzu de is fake news e is interferèntzias russas in su referendum de sa Brexit.

Comente narat su giornale ‘ The Guardian’, difatis, sa Cummissione mèdia chi est ispriculitende a pitzu de is ‘fake news‘, est a nàrrere noas farsas, difùndidas pro mèdiu de internet, at intregadu un’ultimatum a is social mèdia pro chi frunant una sèrie de informatziones intro de su 18 de ghennàrgiu.

“Nche depet èssere una manera pro analizare cussas protzeduras chi permitant a sotziedades comente a Facebook de identificare dae ue lompet un’informatzione pagu crara e segura, mescamente cando a dda mòvere sunt unu sentidu polìticu e una faina de un’àteru Paisu”, at naradu su deputadu cunservadore Damian Collins, chi ghiat sa Cummissione.

Ma Collins est istadu galu prus craru afirmende chi est sa primu borta in ue, si non b’esseret una collaboratzione prena in s’inchiesta, nche diat pòdere èssere “unu carchi tipu de santzione” contra a is duas retzes sotziales.

De custas santziones nde faeddat su ‘Daily Telegraph’ e intre is possibilidades ddoe est cussa de ispìnghere s’indùstria publitzitària a boicotare e contrariare is duos colossos de su web.

de Boxis