Ìndixi Bloomberg: is 500 personas prus ricas de su mundu ammànniant de 1000 milliardus su patrimòniu insoru

Po s’Ìndixi Bloomberg sa crèscida de sa richesa de is 500 personas prus arricas de su mundu est stètia de su 23% cunfrontu a su 2006.

Ìndixi Bloomberg de is prus ricus

Po s’Ìndixi Bloomberg, in su 2017 su patrimòniu de is 500 personas prus ricas de su mundu s’est ammanniau de 1000 milliardus de dòllarus cunfrontu a su 2016.

Sa crèscida de sa richesa de custus 500 assotaus est stètia de su 23% cunfrontu a su 2006. Una cosa ispantosa dèpia pruschetotu a s’ammanniadura de su mercau de is atzionis.

S’òmini prus arricu de su mundu, po s’Ìndixi Bloomberg, ocannu est stètiu Jeff Bezos, su meri de Amazon, chi at ammanniau sa richesa sua de 34,7 milliardus, e est arribau indiritura a possèdiri 100 milliardus de dòllarus. Bezos at superau a Bill Gates chi s’est firmau a 91,6 milliardus ca in su 2017 su patrimòniu suu est crèsciu “sceti” de 9,17 milliardus. Bill Gates perou at donau in beneficèntzia una parti manna de su patrimòniu suu, po mori de sa fundatzioni “Bill & Melinda Gates”.

In sa de tres positzioni ddoi est un’àteru americanu, su finantzieri Warren Buffet, cun 85,5 milliardus de dòllarus – 12,3 in prus cunfrontu a su 2016 -.

Su primu italianu in classìfica ocannu puru est Giovanni Ferrero, in sa de trintunu positzioni. Ferrero tenit unu patrimòniu de 24,4 milliardus, crèsciu de 4,13 milliardus cunfrontu a su 2016. Ddu sighit in sa de trintaseti positzioni Leonardo Del Vecchio, su meri de Luxottica, cun 22,7 milliardus – 3,31 milliardus in prus cunfrontu a su 2016 -.

Silvio Berlusconi s’agatat in sa de centusetantaseti positzioni de s’Ìndixi Bloomberg, cun 8,49 milliardus de patrimòniu, crèsciu de 1,14 milliardus.

Is personas chi in su 2017 tenint unu patrimòniu prus mannu de 1 millioni de dòllarus funt 36 millionis in totu su mundu – 2,3 millionis in prus cunfrontu a su 2016 -. Custas personas, chi funt su 0,7% de sa popolatzioni mondiali, posssedint su 47% de sa richesa de su mundu. Su 70% de sa popolatzioni mondiali possedit sceti 2 2,7% de sa richesa mondiali.

de Boxis