Stranger things, sa rennèscida de is annus ’80

Dispretziaus finas a pagu tempu fait, is annus ’80 funt valutaus de nou. Stranger things ddu cunfirmat.

Strangher things

No si ndi bessit bius de is annus ’80 (cit. Manuel Agnelli). Finas a pagu tempus fait is annus ’80 fiant dispretziaus. No nci fiat cunfrontu cun is dex’annus precedentis. Cantu cussus fiant impinniaus, custus fiant lèbius. Lassada s’ideològia de is annus passaus, parriat chi me is annus ’80 no fessit abarrau prus nudda de beru, e duncas mì is annus sbuidus, mancai de plàstica.

Epuru….is tempus mudant e immoi in su tzìnema, in sa televisioni, me is lìburus est totu unu torrai a cussus annus, a ddus fai torrai a pillu comenti unu perìodu nodiu. Forsis no fiant totu de scavuai, ca is annus a pustis ant ammostau cantu totu podessit essi peus, cun crisi econòmica, gherras e terrorismu.

Sa rennèscida de Stanger things, sa sèrie tv famada de Netflix arribada a sa segunda stasoni, passat pròpriu de is annus ’80. Ca forsis is ammutadoris prus stravanaus funt abarraus firmus in cussus annus. Candu is timorias fiant ingendradas de su disconnotu e fiant fatas de umbras e de murmutus.

Is protagonistas de Stranger things assimbillant meda a is piciocheddus de Stand by me de Stephen King ca sa sèrie est in dèpidu mannu cun su scridori americanu.

Ma is atmosferas de Strangher things andant prus atesu, imprassant su tzìnema de John Carpenter e finas is fumetus de Dylan Dog, mancai is autoris mancu ddu scipiant chi siat su spriculadori inventau de Tiziano Sclavi.

Su fatu est chi Stranger things est de aici stravanau poita ca est acapiau a cussu perìodu, is’ùrtimus dex’annus sena de internet. De insaras a innantis, de internet e de totu su chi at a sighiri, totu at a mudai, finas is timorias nostras.

de Massimiliano Meloni