Is ùrtimos datos subra sa letura de libros in Itàlia

Segundu is ùrtimos datos Istat in Itàlia sa letura de libros est diferente meda intre Nord e Sud

Italianos e letura de libros

In custas dies s’Istat at fatu connòschere is ùrtimos datos subra sa letura de libros in Itàlia, pro s’annu 2016. Bi sunt diferèntzias mannas a livellu de territòriu: sa letura, difatis, resurtat prus difùndida in is regiones de su Nord-est e de su Nord-ovest, in ue su 48% de is persones chi ddoe istant decrarat de àere letu nessi unu libru.

In su Sud, sa cuota de letores falat a su 27,5%, mentras in is ìsulas se realidade est meda diferente intre Sitzìlia, cun su 25,8% de letores e Sardigna cun su 45,7%. Is regiones in ue si decrarat de lèghere de prus sunt sa provìntzia autònoma de Trentu, su Friuli-Venètzia Giùlia, sa provìntzia autònoma de Bolzano, sa Badde de Aosta. Cussas imbetzes is intervistados decrarant de lèghere prus pagu, sunt sa Pùglia, sa Campània, sa Sitzìlia e sa Calàbria a s’ùrtimu postu.

Un’àteru elementu ischirriadore est su chi pertocat is comunas: sa letura de libros resurtat meda de prus difùndida in is comunos de àrea metropolitana in ue si decrarat letore prus pagu de sa metade de is abitantes (48,6%); sa cuota falat a su 35,6% in is comunas cun prus pagu de duamìgia abitantes.

In prus de s’apartenèntzia a unu territòriu, sa letura de libros est acapiada a su cumportamentu e a s’educatzione chi tenet sa famìlia “sa mira a sa letura de is pipios e de is pitzocheddos dda favoresset sa presèntzia de babbos e mamas chi tenent s’abitùdine de lèghere libros”. Pro nàrrere, intre is pitzocos de 11-14 annos, leghet su 72,3% de chi tenet mama e babbu letores e petzi su 33,1% de cussos chi tenent ambos genitores non letores.

de Boxis