Unus milli de partecipantis a sa Màrcia de sa Paxi in Otieri

Rennèscida de sa de trintunu Màrcia de sa paxi, ocannu apariciada in Otieri, dedicada a s’arricida e a s’integratzioni

Màrcia de sa Paxi in Otieri

Unus milli de partecipantis, pruschetotu giòvunus, ariseru in Otieri, po sa de trintunu Màrcia de sa Paxi. Apariciada de sa diòcesi de Abas – Terraba in collaboratzioni cun sa Càritas regionali, su CSV Sardegna Solidale, sa diòcesi de Otieri e su Comunu de Otieri, sa Màrcia teniat comenti mutu is fueddus de Papa Franciscu po sa Dì mondiali de is migrantis: Acòlliri, Amparai, Promovi, Integrai.

Su mundu de su voluntariau sardu, studentis e migrantis funt arribaus de totu sa Sardìnnia finas de su mengianu, po pigai parti a cust’atòbiu de importu, ocannu dedicau a s’arricida e a s’integratzioni. Medas is sìndigus sardus presentis, ghiaus de su sìndigu de Otieri Marco Murgia.

A sa fini de sa Màrcia de sa Paxi, in su palcu cuncordau in pratza Garibaldi ant chistionau de paxi e de spera, me is interventus insoru, is ospitis munsignori Angelo Becciu, segretàriu po is Fainas generalis de sa segreteria de Stadu Vaticana, Andrea Riccardi fundadori de sa Comunidadi de S. Egìdio e Marco Impagliazzo, Presidenti de sa Comunidadi matessi.

de Boxis