“Make your Mark” e sa galania de is fèminas

Nudda Photoshop e nudda ritocos pro sa campagna de publitzidade “Make your Mark” de Missguided.

Nudda ritocos in “Make your Mark”

Sa marca de bistiris Missguided in custas dies at aviadu sa campagna de publitzidade “Make Your Mark”. A “Make your Mark” ant leadu parte modellas chi si sunt fatas tirare fotografias aici comente sunt de a veras, sena de si faghet megiorare cun programmas de ritocu digitali.

Custu progetu est nàschidupro tzelebrare s’individualidade e pro cumbidare a chie si siat a s’atzetare e a s’istimare pro sa bisura chi tenet.

Giai in passadu, Missguided aiat retzidu cumplimentos pro no àere fatu impreu de ritocos in is fotografias promotzionales: sighende custa àndala, s’azienda at detzìdidu de inclùdere in sa campagna noa fèminas chi siant a tesu dae cussa idea de bellesa chi cunditzionat su mundu de sa moda, e de ddas esaltare in totu sa bellesa issoro.

In prus de is modellas, a “Make your Mark” ant leadu parte iscritoras de su mundu digitali e ativistas puru, chi dae tempus traballant pro imbiare unu messàgiu de profetu pro chi s’atzetit su corpus pro comente est.

Sa modella e ativista Felicity Hayward, faeddende de custa faina, at naradu “Penso siat a beru de importu a promòvere un’ immàgine bona de su corpus pro ite semus totu in custa terra comente a indivìduos. Est pròpiu s’individualidade chi nos faghet bellos e ùnicos”. “Mi praghet a promòvere su corpus meu, is ismalliaduras de sa pedde, sa pedde saginosa. A èssere sintzera creo chi is difetos, is imperfetziones no esistant. Creo chi imbetzes siant istados is mèdios-massivos a ddos creare, pro fàghere intèndere is persones dudosas e impreare cussa pagu seguresa pro fàghere dinare.

Marke Your Mark” faghet parte de una campagna publitzitària prus manna de Missguided, “Keep On Being You”, cumentzada a santugaine, chi tenet a sa matessi tarea de tzelebrare su corpus de is fèminas in sa galania issoru.

S’entusiasmu a inghìriu de custas campagnas de publitzidade est unu signale de su fatu chi is impitadores tèngiant bisòngiu de màgines beras, non prus de coberteddas arrangiadas e traitoras, chi contant de unu mundu chi no est reale.

de Manuela Ennas