Migrantis e arricida, is fueddus de Papa Franciscu in sa Missa de Paschixedda

In sa Missa de puddu de sa noti de Paschixedda Papa Franciscu torrat a preguntai solieradidadi po is migrantis, chi si nci fuint de is Erode de oi.

Papa Franciscu e is migrantis

Papa Franciscu at dedicau sa Missa de puddu de sa noti de Paschixedda in Santu Pedru a is migrantis.

Su Papa at bòfiu arregordai cussus “chi ddis tocat a lassai sa terra insoru po subrabiviri a is Erode de oi chi po imponni su poderi e ammanniai sa richesa insoru no timint de fai scurri su sanguini de is notzentis” e at repìtiu is fueddus de Papa Giuanni Pàulu II: “no depeit timi, aberrei is gennas a Gesus”.

Papa Franciscu at tentu fueddus puru po is gherras chi insanguentant su mundu arregordendi s’Orienti de mesu e s’Àfrica.

Po su chi pertocat sa crisi intra de israelianus e palestinesus at nau chi sa spera sua est chi si potzat arribai a sa cumbividura in paxi de duus Stadus, aìnturu de is làcanas cuncordadas e arreconnòscias de sa comunidadi internatzionali. Fueddus puru po sa crìsi in sa Corea de su Nord e in Venetzuela.

Mancai no apat nomingiau is Rohingya, Papa Franciscu at nau chi torrat a biri Gesus me in totu is pipius chi at atobiau in s’ùrtimu biaxi suu in Birmània e in Bangladesh.

de Massimiliano Meloni