Pasca de Nadale. S’e-commerce tragat is consumos

Pro Pasca de Nadale 2017 is italianos ant imbellidu prus pagu sa domo ma ant batidu prus màndigu in sa mesa

Pasca de Nadale e gastos

Pro is festividades de Pasca de Nadale is italianos ant gastadu in totu sa bellesa de 10 milliardos de èuros, cun un’importu procapite chi includet donos, cuncordaduras pro sa domo, cosa de papare e bufare paris a 166 èuros, in repìgliu de su +2% cunfronta s’annu passadu.

“A tragare is gastos de Nadale sunt istados is màndigos, s’eletrònica, s’hi-tech e su cummèrtziu in lìnia, setores chi ant registradu bèndidas in crèschida finas a su deghe pro chentu in prus respetu a su 2016.– comente narat su Codacons in una nota de custas dies –.

Pro is còmporas in lìnia est istada un’impennada a beru, cun unu donu subra de tres seberadu ocannu in su web, mentras su gastu pro s’àrbore de Nadale e is frunimentos pro sa domo s’est ismenguadu de su tres pro chentu”.

Duncas pro sa Pasca de Nadale 2017 is italianos ant imbellidu prus pagu is domos issoro ma ant batidu prus màndigu in sa mesa. Ant gastadu de prus pro is biàgios ma ant averiguadu su gastu pro is donos, chirchende de non propassare; ant torradu a impreare su presèpiu, s’àrbore e is lughes chi teniant giai ma ant comporadu in lìnia su smartphone nou“.

de Boxis