“A Chent’annos in salude”. Partit su programma sportivu de sa Regioni chi pertocat is chi tenint prus de 65 annus

A Chent’annos in salude, at a pertocai cuatrumilla participantis chi tenint prus de 65 annus e 44 struturas sportivas spaniadas in totu sa Regioni.

Presentau “A chent’annos in salude”

Presentau ariseru in Casteddu de s’Assessori regionali a sa Sanidadi Luigi Arru “A chent’annos in salude”, su programma bòfiu de sa Regioni, in collaboratzioni cun su Coni regionali e sa Scola regionali de su sport, chi pertocat sa promotzioni de s’atividadi sportiva po is chi tenint prus de 65 annus.

A s’atòbiu ant pigau parti puru su Presidenti regionali de su Coni Gianfranco Fara e su Diretori scientìficu de sa scola de su sport Gian Carlo Migliaccio.

Ant a essi cuatrumilla in totu – milla in una prima fasi – is chi tenint prus de 65 annus chi ant a pigai parti a su programma.

Is participiantis a su programma ant a essi arricius de 44 struturas sportivas spaniadas in totu sa Regioni e chi tenint critèrius mannus apitzus de sa calidadi, sa seguresa e sa formatzioni de is tènnicus.

A chent’annos in salude” prebidit unu tretu de atividadi motòria de un’ora po tres bortas a sa cida, po tres mesis. S’atividadi dd’ant a fai sighius de is tennìcus.

A chent’annos in salude rapresentat una tarea fundamentali de sa Sanidadi in custa legisladura, cussu de sa preventzioni” at nau s’Assessori regionali de sa Sanidadi Luigi Arru “ e custa Giunta at aprovau, intra de is primu cosas, unu programma chi pertocat sa preventzioni, finantziau cun 40 millionis de èuros. Scieus chi is determinantis po sa saludi, chi prima fiant virus e batèrius, ddus ant arremprasaus àterus fatoris, comenti sa sedentariedadi. No si moveus, pipaus, no castiaus su pesu, papaus mali. S’atividadi motòria fitiana est fondamentali po si donai prus annus de vida, e de vida de calidadi”.

de Boxis