BTO 2016. Sa Sardigna b’est!

Ddoe at a èssere puru sa Sardigna a sa BTO 2016, s’eventu de riferimentu in Itàlia pro su mundu de su turismu.

Sa Sardigna a BTO 2016

Cras, su 30 de Onniasantu at a cumintzare in Firenze, in sa Fortezza da Basso, sa de noe editziones de sa BTO, acrònimu de Buy Tourism online. Ant a èssere duas dies de addòbios, seminàrios, laboratòrios, in ue espertos de su setore ant a chistionare e resonare de sa connessione intre de turismu e innovatzione.

Ocannu est Why!, duncas Pro ite! su tema seberadu dae is organizadores de sa Bto 2016. E a pitzu de su pro ite si sèberat unu biàgiu in antis de ddu comporare chi s’at a resonare in custa ocasione. Ite est chi ispinghet sa gente a seberare unu logu in càmbiu de un’àteru? Ite leat in consideru unu turista cando est aparitzende una vacàntzia? Pro ite una famìlia, un’istitutzione iscolàstica, una còpia de giòvanos agatant in Itàlia una destinatzione ideale pro unu biàgiu?

Tando est craru chi sa BTO 2016 est su logu in ue si chircat de donare rispostas a custa pregontas, est sa manera pro cumprèndere cale turismu s’Itàlia podet ofèrrere, comente podet megiorare, e fintzas comente si podet contare totu custu pro mèdiu de is ainas digitales. Ca a contare bene est de fundamentu pro atirare is turistas mescamente oe in die, in una sotziedade chi bivet in connessione fitiana e tenet bisòngiu de informatziones pretzisas a portada de manu.

In custu iscenàriu de sa BTO 2016 non podiat mancare sa Sardigna, pro s’importu chi s’ìsula tenet in contu de turismu. A dda rapresentare ddoe ant a èssere mèrcuris a is tres de meigama s’antropòloga culturale Alessandra Guigoni e Gianluigi Riva, connotu in su web comente Insopportabile, ingennieri cun sa passione de su turismu.

In s’interventu issoro ant a faeddare de Food experience e de cantu su màndigu siat e potzat èssere un’elementu detzisivu a intro de unu biàgiu. Oe su turista bolet mandigare comente chi èsseret unu de su logu, tastare is cosas de sa traditzione, is produtos locales, naramus chi bolet fàghere un’esperièntzia gastronòmica sintzera e non ddi bastat prus papare cosa giai connotas ca chircat semper coas noas, gustos de portare a intro de su coro comente is àteros ammentos de su biàgiu.

Sa Sardigna est unu logu chi podet cuntentare is turistas, non petzi pro sa bellesa de sa natura, ma pro totu su chi tenet de fàghere connòschere in fatu de enogastronomia. Est custu chi Alessandra Guigoni e Insopportabile at a contare in sa BTO 2016, ponende in lughe is prendas de sa terra nostra, in relatzione cun is traditziones, cun is logos de orìgine, cun sa manera de ddas mantènnere bias gasi chi potzant sighire a contare de unu pòpulu chi est torrende a ddas tènnere in pràtica, a ddas avalorare comente meressent. Est una richesa manna chi sa Sardigna tenet e de seguru sa BTO 2016 at a èssere de agiudu pro iscobèrrere bias noas de isvilupu turìsticu e pro dda fàghere apretziare dae totu su mundu in sa sua singularidade.

de Manuela Ennas