70 annus fait in Itàlia is fèminas votànt po sa primu borta

Oi su votu de is fèminas parit una cosa achirida de sèmpiri ma est una conchista sceti de 70 annus fait.

su deretu de votu de is fèminas

70 annus fait is fèminas votànt in Itàlia po sa primu borta. Oi su votu de is fèminas parit una cosa achirida e normali de dònnia logu tzivili e si spantaus chi no siat diaici in totu su mundu, ma po s’Itàlia puru est stètiu una conchista recenti. Una conchista arribada pustis una batalla longa chi in àterus stadus europeus e in is Stadus Unius fiat giai achirida de meda. Su movimentu po su deretu de votu de is fèminas nascit difatis in Itàlia puru a sa fini de s’800, sighendi s’esèmpiu de is movimentus de is Sufragette in su Rènniu Uniu e in is Stadus Unius.

In contu de Suffragette, in custas diis is tzìnemas funt donendi una bella pellìcula chi tenit pròpriu custu tìtulu. Sa pellìcula, girada de Sarah Gavron e recitada de Helena Bonham Carter e Meryl Streep, contat is fainas de una truma de fèminas britànnicas chi a s’inghitzu de su ‘900 cumbatiant custa batalla.

Est cun sa primu gherra mundiali chi in s’opinioni pùbrica inghitzat a si spaniai un’atentzioni prus manna po su deretu de votu de is fèminas. Difatis, in su mentris chi is òminis funt atesu po cumbati, is fèminas ddus arremprasant in su traballu, finas in is fàbricas, e su rolu insoru aìnturu de sa famìllia diventat ancora prus de importu.

De aici, a s’incràs de sa gherra Emanuele Modigliani, unu deputau sotzialista, presentat una proposta de lei po arreconnosci a is fèminas su deretu de votu. Ma su 1922 est un’annu malu po is deretus. Is fascistas faint sa màrcia conca a Roma e ndi liant su poderi. Fini de su discursu.

Chi in Germània su deretu de votu de is fèminas benit introdùsiu indiritura in su 1919, in is Stadus Unius in su 1920 e in su Rènniu Uniu in su 1928, s’Itàlia depit abetai s’acabu de su fascismu e de sa segunda gherra mundiali. Est in una natzioni noa chi su deretu est finalmenti arreconnotu e is fèminas podint andai a votai.

Su 10 de martzu de su 1946, gràtzias a unu decretu de un’annu innantis, apitzus de una proposta de Togliatti e de De Gasperi, votant po is eletzionis aministrativas in giai 400 comunus. Pustis de duus mesis ant a votai po una cosa prus de importu, su referendum po scioberai intra de Repùbrica e Monarchia e po eligi sa Costituenti. Ma 70 annus fait, su matessi 10 de martzu un’àteru decretu arreconnoscit a is fèminas, in prus chi su deretu de votai, cussu de essi votadas puru, est a nai de essi candidadas a is eletzionis. Ant a essi 21 is fèminas elìgias a sa Costituenti.

de Massimiliano meloni